काठमाडौं । चालु आर्थिक वर्षको पछिल्लो १० महिनामा ५४ करोड २० लाख ६५ हजार रुपैयाँ बराबरको सेनिटाइजर आयात भएको छ ।
भन्सार विभागले सार्वजनिक गरेको वैशाख मसान्तसम्मको तथ्याङ्कले यस्तो देखाएको हो । विभागका अनुसार वैशाख मसान्तसम्म १ हजार ७१८ टन सेनिटाइजर नेपाल आयात भएको जनाएको छ ।
नेपालमा छिमेकी दुई मुलुकसहित एक दर्जनबढी देशहरुबाट सेनिटाइजर आयात हुने गरेको पाइएको छ । वैशाख मसान्तसम्म सबैभन्दा धेरै भारतबाट आयात भएको छ । उक्त अवधिमा भारतबाट मात्रै ३८ करोड ७८ लाख १० हजार रुपैयाँ बराबरको १ हजार ३५४ टन सेनिटाइजर आयात भएको छ ।
चीनबाट ११ करोड ५४ लाख ३६ हजार रुपैयाँ बराबरको २९९ टन सेनिटाइजर आयात भएको विभागले जनाएको छ । त्यसैगरि, यूएईबाट १ करोड ७६ लाख १५ हजार रुपैयाँ बराको २८ हजार ४१९ केजी सेनिटाइजर आयात भएको छ ।
यस्तै, भेटनामबाट ३० हजार २६९ केजी सेनिटाइजर आयात भएको छ । यो रकमा भने १ करोड ५३ लाख ३२ हजार रुपैयाँ बराबरको हो ।
बैशाख मसान्तसम्म कोरियाबाट ५ हजार ४ केजी अर्थात ३५ लाख ३ हजार रुपैयाँ बराबरको, बंगलदेशबाट ८ लाख ७९ हजार रुपैयाँ बराबरको १ हजार ८ केजी, मलेशियाबाट ११ लाख ६२ हजार १८० केजी सेनिटाइजर आयत भएको छ ।
यी लगायत नेपालमा इटली, जापान, न्युजरल्याण्ड, सिंगापुर, स्वीडेन र अन्य मुलुकहरुबाट सेनिटाइजर आयात भएको छ ।
वि.सं.२०७८ जेठ १० सोमवार १५:३७ मा प्रकाशित
