काठमाडौं । आन्तरिक राजस्व विभागले आगामी आर्थिक वर्ष २०७८-७९ का लागि (प्राकृतिक व्यक्ति) व्यक्तिगत तर्फको करको दर सार्वजनिक गरेको छ ।
विभागले सार्वजनिक गरेको दरमा एकल व्यक्ति र दम्पत्तीको लागि करको दर फरक फरक रहेको छ । विभागका अनुसार रोजगारीको आयमात्र हुने एकल व्यक्तिले वार्षिक ४ लाखसम्म करयोग्य आयमा १ प्रतिशत र दम्पती हुनेले वार्षिक ४ लाख ५० हजारसम्म करयोग्य आय भएमा एक प्रतिशतका दरले कर तिर्नुपर्ने छ ।
एकले व्यक्तिले ४ देखि ५ लाखसम्म करयोग्य आय भएमा न्यूनतम ४ हजारका अतिरिक्त ४ लाखदेखि ५ लाखसम्मको रकममा १० प्रतिशतका दरले कर तिर्नुपर्ने छ।
दम्पतीको हकमा ४ लाख ५० हजारदेखि ५ लाख ५० हजारसम्म करयोग्य आयमा न्यूनतम ४ हजार ५०० का अतिरिक्त ४ लाख ५० हजारदेखि ५ लाख ५० हजारसम्म १० प्रतिशतका दरले कर तिर्नुपर्ने छ ।
५ देखि ७ लाखसम्म करयोग्य आय भएमा एकल व्यक्तिले न्यूनतम १४ हजारका अतिरिक्त ५ लाखदेखि ७ लाखसम्म २० प्रतिशतका दरले कर तिर्नुपर्ने छ । दम्पतीको हकमा ५ लाख ५० हजारदेखि ७ लाख ५० हजारसम्म करयोग्य आय भएमा न्यूनतम १४ हजार पाँचसयका अतिरिक्त ५ लाख ५० हजारदेखि ७ लाख ५० हजारसम्मको रकममा २० प्रतिशत कर तिर्नुपर्ने छ ।
विभागका अनुसार ७ देखि २० लाखसम्म करयोग्य आय भएमा एकल व्यक्तिले न्यूनतम ५४ हजारका अतिरिक्त ७ देखि २० लाखसम्म ३० प्रतिशत कर तिर्नुपर्नेछ भने दम्पतीको हकमा ७ लाख ५० हजारभन्दा माथि २० लाखसम्म करयोग्य आय भएमा न्यूनतम ५४ हजार ५०० का अतिरिक्त ७ लाख ५० हजारदेखि २० लाखसम्म ३० प्रतिशत कर तिर्नुपर्छ ।
विभागका अनुसार २० लाखभन्दा बढी करयोग्य आय भएमा एकल व्यक्तिको हकमा वार्षिक ४ लाख ४४ हजारका अतिरिक्त २० लाखभन्दा बढी रकममा ३६ प्रतिशतका दरले कर तिर्नुपर्ने छ । दम्पतीको हकमा २० लाखभन्दा बढी करयोग्य आय भएमा न्यूनतम ४ लाख २९ हजार ५०० का अतिरिक्त २० लाखभन्दा बढी रकममा ३६ प्रतिशतका दरले कर तिर्नुपर्ने विभागले जनाएको छ ।
वि.सं.२०७८ असार ८ मंगलवार १०:४९ मा प्रकाशित
