काठमाडौं । अख्तियार दुरूपयोग अनुसन्धान आयोगले कर फछर्यौट आयोग, २०७१ का पदाधिकारीहरु अध्यक्ष लुम्बध्वज महत, सदस्यद्वय उमेशप्रसाद ढकाल र चुडामणी शर्मा ढकाल विरुद्द १ अर्ब ३३ लाख २० हजार ३८५ रुपैयाँ भष्ट्राचार गरेको ठहर गर्दै विशेष मुद्दा दर्ता गरेको छ ।
आन्तरिक राजस्व विभागका पूर्व महानिर्देशक चुडामणी शर्मा, ढकाल र महतले १ अर्ब ३३ लाख २० हजार ३८५ रुपैयाँ बराबर भष्ट्राचार गरेको ठहर गर्दै बुधबार विशेष अदालत काठमाडौंमा मुद्दा दायर गरेको आयोगले जनाएको छ ।
उनीहरुले सरकारले पाउने राजस्व चुहावट गरी भ्रष्टाचार गरेको भनी आयोगमा परेको उजुरीमा अनुसन्धान गर्दा बदनियपूर्वक १ अर्ब ३३ लाख २० हजार ३८५ रुपैयाँ कर छुट दिएको देखिएको आयोगले जनाएको छ ।
तत्कालीन कर फर्छ्यौट आयोगका पदाधिकारी रहेका प्रतिवादीहरूले कर फर्छ्यौट आयोग ऐन, २०३३ को दफा १७ बमोजिम असल नियतले आफ्नो कार्य सम्पादन नगरी आफ्नो व्यक्तिगत लाभ हुने तथा राज्यलाई हानिनोक्सानी पुर्याई बदनियतपूर्ण कार्य गरेको स-प्रमाण पुष्टि भएको भन्दै आयोगले मुद्दा दर्ता गरेको हो ।
उनीहरुलाई भ्रष्टाचार निवारण ऐन, २०५९ को दफा ७ र दफा ७ को देहाय (क) मा परिभाषित कसुर गरेको पुष्टि हुन आएकोले प्रतिवादीहरु महत र ढकाललाई भ्रष्टाचार निवारण ऐन, २०५९ को दफा ७ ले उल्लेख गरेबमोजिम बिगो एक अर्ब ३३ लाख २० हजार ३८५ रुपैयाँ मागदाबी लिई विशेष अदालत काठमाडौंमा आरोपपत्र मुद्दा दायर गरिएको छ ।
वि.सं.२०७८ असार ९ बुधवार १५:०६ मा प्रकाशित
