काठमाडौं । कोरोना महामारीका कारण उपत्यकामा निषेधाज्ञा एक साताको लागि अझै थपिएको छ । तर पहिला भन्दा निकै खुकुलो बन्दै गएको छ । कोरोना महामारी पहिला भन्दा केही सहज भएपनि अझै पनि कमी भने भएको छैन । जसले गर्दा अझै पनि सबै सञ्चालनमा आउन सकेको छैन ।
निषेधाज्ञा खुकुलो भएपनि अझै पनि सबै प्रकारका सभा, सम्मेलन, गोष्ठी, तालिम, सेमिनार, सिनेमा हल, पार्टी प्यालेस, डान्सबार, दोहोरी, नाचघर, क्लव, स्वीमिङ पुल, मनोरज्जन स्थल, सैलून, ब्यूटी पार्लर, हेल्थक्लब, फुटसल, जिमखाना, पुस्तकालय, संग्रहालय, चिडियाखाना, रंगशालामा हुने दर्शक सहितको खेलकुद र मानिसहरुको भिडभाड हुने अन्य कार्यक्रम संचालन गर्न पाइने छैन ।
यस्तै खुला स्थानमा मानिसहरु भेला जम्मा हुन, भिडभाड गर्न, सभा जुलुस, जात्रा, महोत्सव, भोज भतेर आदि गर्न पनि पाइने छैन । जिल्ला प्रशासन कार्यालयका अनुसार विवाह, व्रतबन्ध तथा सामूहिक रुपमा गरिने सांस्कृतिक कार्यहरु होटल तथा पार्टी प्यालेसमा गर्न पाएने छैन । यस्तै पुजारीबाट हुने नित्य पूजा बाहेकका अन्य धार्मिक तथा साँस्कृतिक गतिविधिहरु संचालन गर्न पाइने छैन ।
कार्यालयका अनुसार शैक्षिक संस्थाहरु (विद्यालय, कलेज, टयूसन सेन्टर, तालिम केन्द्र) ले भौतिक उपस्थितिमा पठन पाठन तथा परीक्षाहरु संचालन गर्न गराउन पाइदैन । अत्यावश्यक सामग्री बोकेका हुवानीका सवारी साधन, बिरामी तथा कुरूवा (२ जना) बोकेका एम्बुलेन्स, स्वास्थ्यकर्मी, पशु स्वास्थ्यकर्मी तथा सुरक्षा निकायले प्रयोग गर्ने सवारी साधन र अन्य जिल्लाबाट सवारी पास लिई आएका बाहेक अन्य सवारी साधन काठमाडौं जिल्ला भित्र प्रवेशमा रोक लगाइने छ ।
अत्यावश्यक कार्य जस्तै मृत्यु संस्कार, बिरामी तथा कुरुवा लगायतका कार्यका लागि उपत्यका बाहिर जान सम्बन्धित स्थानीय तहको सिफारिस सहित जिल्ला प्रशासन कार्यालयमा निवेदन पेश गरेमा अन्तर जिल्लामा आवत जावत गर्न सहजीकरण गरिने प्रशासन कार्यालयले जनाएको छ ।
वि.सं.२०७८ असार १४ सोमवार १२:५८ मा प्रकाशित
