काठमाण्डौं । प्रधानमन्त्री केपी ओली चीन भ्रमण सकाएर आज स्वदेश फर्कँदै छन् भने आजै प्रधानसेनापति राजेन्द्र क्षत्री चीन भ्रमणमा जाँदैछन् ।
चीनका जनमुक्ति सेना प्रधानसेनापति फङ फेनघुईको औपचारिक निमन्त्रणामा औपचारिक भ्रमणका लागि प्रधानसेनापति क्षत्री चीन प्रस्थान गर्न लागेका हुन्। नेपाली सेनाको प्रमुखको जिम्मेवारी सम्हालेपछि प्रधानसेनापतिले पहिलोपटक चीन भ्रमण गर्न लागेका हुन्। चीन भ्रमणका लागि प्रधानसेनापति क्षत्री आइतबार चीनको छेन्दु हुँदै बेइजिङ प्रस्थान गर्ने कार्यक्रम रहेको सैनिक जनसम्र्पक निर्देशनालयले जनाएको छ। क्षत्रीसहितको उच्चस्तरीय सैनिक टोली चीनको साताव्यापी भ्रमण पूरा गरेर यही चैत २० गते स्वदेश फिर्ता हुने कार्यक्रम रहेको सेनाले जनाएको छ ।
आज आफ्नो आठ दिने औपचारिक चीन भ्रमण सकेर प्रधानमन्त्री केपी शर्मा ओली स्वदेश फर्किँदै छन्। चिनियाँ प्रधानमन्त्री ली खछ्याङको निमन्त्रणामा चीनको औपचारिक भ्रमणका लागि चीन पुगेका प्रधानमन्त्री ओली आइतबार अपरान्ह स्वदेश फर्कन लागेका हुन्।
१४ चैत, २०७२, ९.००
वि.सं.२०७२ चैत १४ आइतवार ११:२४ मा प्रकाशित
