काठमाडौं । नेपाल सुनचाँदी रत्न तथा आभुषण महासंघले अर्थतन्त्त उकास्न र व्यापार घाटा कम गर्न बहुमूल्य बस्तुको निकासीलाई प्रोत्साहित गर्नु पर्नेमा जोड दिएको छ ।
महासंघका अध्यक्ष अध्यक्ष रमेश महर्जनको नेतृत्वमा गएको प्रतिनिधि मण्डल र अर्थमन्त्री जनार्दन शर्माबीच कोभिड–१९ को दुष्परिणामबाट शिथिल बनेको अर्थतन्त्रलाई पुनर्उत्थान गर्न र वाह्य व्यापारमा देखिएको अत्याधिक घाटालाई कम गर्नुपर्ने उपायहरु लगायतका विषय छलफल भएको हो ।
महासंघले मुलुकको कूल वाह्य व्यापारमा असन्तुलन बढेर आयात ९२ प्रतिशतर निर्यात ८ प्रतिशतमा सीमित हुन पुगेको गंभिर अवस्थालाई दृष्टिगत गरी अर्थतन्त्रमा महत्वपूर्ण रुपमा मूल्य अभिवृद्धि गर्न सक्ने वहुमुल्य वस्तुहरुको निर्यातलाई प्रोत्साहित गर्नु पर्नेमा जोड दिएको हो ।
देश भित्र वर्षेनी अवौं मूल्यका सुन, चाँदी, रत्न, पत्थर आदि वहुमूल्य वस्तुहरु आयात भइरहेको छ । तर स्वदेशी भूगर्भमा थुप्रै प्रकारका वहुमूल्य धातु तथा रत्न, पत्थर आदि रहेको अनुसन्धानबाट पुष्टी भएको छ । तसर्थ तिनीहरुको उत्खनन र प्रशोधन भएमा आयात प्रतिस्थापनमा ठूलो टेवा पुग्नेछ भने निर्यात पनि गर्न सकिने महासंघले भनेको छ ।
अन्तराष्ट्रिय बजारमा नेपाली मौलिक वहुमुल्य गहना प्रति ठूलो आकर्षण छ । नेपालबाट निकासी हुने अन्य वस्तुले पाए सरहको सुविधा पनि वहुमूल्य गहनाको निकासीमा उपलव्ध छैन ।
अर्थतन्त्रमा बढी लाभ दिन सक्ने क्षेत्र नै कुष्ठित भएकोले निर्यात व्यापारले गति लिन सकेको छैन । परंपरागत वस्तुको निर्यात र पुरानै कार्यशीेली मात्रै वाह्य व्यापारमा सुधार हुन सक्तैन । तसर्थ कम तौल र उच्च मूल्यका वहुमूल्य गहनाको निर्यातलाई प्रोत्साहित गर्नु जरुरी छ ।
विद्यमान व्यापार घाटा कम गर्नमा उल्लेख्य योगदान हुन सक्ने भएकोले त्यस तर्फ अविलम्व कदम चाल्न नेपाल सरकार समक्ष महासंघले अनुरोध गरेको छ ।
आभुषण व्यवसायले वृहत आकार लिइसकेको र आम नागरिकको समेत ठूलो लगानी भइसकेको यस क्षेत्रलाई थप व्यवस्थित तुल्याउनु जरुरी रहेको महासंघले जनाएको छ ।
सुनको आयातमा कोटा निर्धारण गरी बढ्दो मागलाई नियन्त्रण गरिएको र आयातको एकाधिकार वाणिज्य बैंकहरुलाई मात्रै दिइएकोले वहुमूल्य गहनाको कच्चा पदार्थको आपूर्तिमा अन्योलको स्थिति उत्पन्न भईरहेको महासंघले जनाएको छ ।
मागको अनुपातमा आपूर्तिलाई सहज तुल्याउन कोटा बढाउन वा बैंकको एकाधिकार अन्त्य गरी सुन आयातलाई ओजीएल अन्तर्गत ल्याइनु पर्नेमा महासंघले जोड दिएको छ ।
वि.सं.२०७८ साउन ७ बिहीवार १७:१८ मा प्रकाशित
