काठमाडौ । ग्लोबल आईएमई बैंकका प्रमुख कार्यकारी अधिकृत रत्नराज बज्राचार्यले बैंक तथा वित्तिय संस्थाहरुले दिने निक्षेपको व्याजदर नै १८ प्रतिशतसम्म पुग्ने बताएका छन् । उनले पछिल्लो समयमा बैंक तथा वित्तिय संस्थाहरुमा तरलताको समस्या गहिरिदै गएको र यसले आगामी असारसम्ममा थप गहिरिएर निक्षेपको व्याजदर १८ प्रतिशतसम्म पुग्ने सम्भावना रहेको बताएका हुन् ।
नेपाल उद्योग बाणिज्य महासंघको आयोजनामा राजधानीमा आयोजित छलफल कार्यक्रममा उनले फागुन महिनामा नै निक्षेपको व्याजदर रेमिट्यान्समा १२.३ र अन्य निक्षेपमा ११.३ प्रतिशतसम्म रहेको छ, यही प्रकारले बढ्दै जाने हो भने १८ प्रतिशतसम्म पुग्ने बताए ।
उनले बैंक तथा वित्तिय संस्था अप्ठेरो अवस्थामा रहेको दावी गर्दै गत साता मौद्रिक नीतिको अर्धबार्षिक समिक्षा मार्फत नेपाल राष्ट्र बैंक आफैले २ प्रतिशत बैंक दर बढाएको र अब अन्य बैंकले पनि बढाउनुपर्ने भन्दै तरलता थप गहिरिएको प्रमाण भएको र यसले वित्तिय क्षेत्रमा समस्या हुने दावी गरे ।
त्यस्तै उनले बैंकहरुको पुँजीबृद्धिका कारण स्रोतको परिचालन अत्यधिक भएकोले तरलतामा दबाब परेको दावी गरे । उनले कर्जा लिनदेखि तत्काल नाफा कमाउनका लागि पनि उद्योग धन्दाभन्दा व्यापार नै सहज भएको भन्दै कर्जाको प्रबाह पनि सोही तर्फ केन्द्रित भएको स्वीकारे ।
त्यस्तै सो कार्यक्रमाम योजना आयोगका पूर्व सदस्य डा. गोविन्द नेपालले पछिल्लो समयमा सिमित मान्छेहरुले पहुँचको आधामा मात्र कमाइरहेको बताउँदै अधिकांश मानिसहरु गुजारा मात्र गरिरहेको र बाच्नका लागि संघर्ष गरिरहेको देखिएको बताए ।
उनले अव अर्थतन्त्रको गम्भीर समिक्षा गरेर अगाडी नबढ्ने हो भने ठूलो दुर्घटना हुने दावी गरे । व्यापारी र राजनीति मिसिएको उनले बताए। पैसा कमाउन राजनीति गर्ने र राजनीतिबाट कमाएर व्यापार गर्ने प्रवृत्ति बढेको उनको भनाइ थियो।
वि.सं.२०७८ फागुन ११ बुधवार १६:३४ मा प्रकाशित