काठमाडौं । ज्योति विकास बैंकले चालु आर्थिक वर्षको दोस्रो त्रैमाससम्मको अपरिष्कृत वित्तीय विवरण प्रकाशित गरेको छ। चालु आर्थिक वर्षको दोस्रो त्रैमाससम्म आइपुग्दा बैंकको खुद नाफा १९०.६७ प्रतिशतले बढेर १० करोड १० लाख रुपैयाँ कायम भएको छ । गत वर्षको यसैअवधिमा बैंकले ३ करोड ४७ लाख रुपैयाँ खुद नाफा कमाएको थियो ।
समिक्षा वधिमा खुद ब्याज आम्दानी सामान्य घटेको छ भने सञ्चालन नाफा बढेको छ । सञ्चालन नाफा बढ्दा बैंकको मुनाफा बढ्न पुगेको छ । बैंकको खुद ब्याज आम्दानी २.३६ प्रतिशतले घटेर १ अर्ब १२ करोड रुपैयाँमारहेको छ ।
बैंकको सञ्चालन नाफा १९६.७३ प्रतिशतले बढेर १४ करोड ७३ लाख रुपैयाँ कायम भएको छ । यस अवधिमा बैंकको वितरणयोग्य नाफा २४ करोड ८४ लाख रुपैयाँ रहेको छ ।
पुस मसान्तसम्म आइपुग्दा ज्योतिको नाफासँगै प्रतिसेयर आम्दानी पनि बढेर ४ रुपैयाँ ६० पैसा कायम भएको छ । गत वर्ष प्रतिसेयर आम्दानी १ रुपैयाँ ६३ पैसा रहेको थियो ।
बैंकको प्रतिसेयर नेटवर्थ १३३ रुपैयाँ ०१ पैसा रहेको छ । हाल बैंकको चुक्ता पुँजी ४ अर्ब ३९ करोड रुपैयाँ छ । बैंकको रिजर्भकोषमा १ अर्ब ६९ करोड रुपैयाँ छ ।
वि.सं.२०८० माघ ७ आइतवार १४:१७ मा प्रकाशित
