काठमाडौं । सञ्चालनमा रहेका वाणिज्य बैंकमध्ये अहिलेसम्म ११ वटा ले लाभांश घोषणा गरेका छन् ।
बैंकहरुले आर्थिक वर्ष २०७७-०७८ को मुनाफाबाट लगानीकर्तालाई लाभांश घोषणा गरेका हुन् ।
अहिलेसम्म लाभांश घोषणा गरेका बैंकमा सबैभन्दा बढी हिमालयन बैंकको रहेको छ । बैंकले २६ प्रतिशत लाभांश दिने प्रस्ताव गरेको छ । बैंकले दिन लागेको लाभांशमा बोनस २१.३८ र नगद ४.६२ प्रतिशत रहेको छ । लाभांश घोषणा गरेका बैंकमा दोस्रोमा सानिमा बैंकको रहेको छ । बैंकले १७.८९ प्रतिशत लाभांश दिने प्रस्ताव गरेको छ । जसमा बोनस १७ र नगद ०.८९ प्रतिशत रहेको छ ।
यस्तै नेपाल बैंकले १७ प्रतिशत, नेपाल इन्भेष्टमेन्ट बैंक र सिटिजन्स बैंकले १६–१६ प्रतिशत, नेपाल बंगलादेश बैंकले १५.५ प्रतिशत, सिद्धार्थ बैंकले १५ प्रतिशत, माछापुच्छ्रे बैंकले १४ प्रतिशत, स्टयान्डर्ड चार्टर्ड बैंकले १३.०६, ग्लोबल आईएमई बैंक १३.५ प्रतिशत लाभांश दिने प्रस्ताव गरेको छ । यस्तै कुमारी बैंकले ८.६७ प्रतिशत लाभांश दिने प्रस्ताव गरेको छ । सबैभन्दा कम लाभांश कुमारी बैंकको रहेको छ ।
बैंकले घोषणा गरेको लाभांशमा सबै भन्दा बढी बोनस हिमालयन बैंकको रहेको छ । यसपछि सानिमा, सिद्धार्थ बैंक, नेपाल बैंक, माछापुच्छ्रे , नेपाल इन्भेष्टमेन्ट लगायतका बैंकको रहेको छ । बोनस पनि सबैभन्दा कम कुमारी बैंककै रहेको छ ।
नगद लाभांश बढी दिनेमा हिमालयन बैंक नै रहेको छ । बैंकले करसहित ४.६२ प्रतिशत नगद लाभांश दिने प्रस्ताव गरेको छ । लाभांश घोषणा गरेका मध्ये कुमारी, सानिमा र माछापुछ«े बैंकले बुक क्लोजको मिति सार्वजनिक गरिसकेका छन । यस्तै साधारणसभाको मिति पनि तय गरिसकेका छन् ।
यी कम्पनीले घोषणा गरेको लाभांश नेपाल राष्ट्र बैंकले स्वीकृत गरेर बैंकको आगामी साधारणसभाले पारित गरेपछि घोषित लाभांश पाउनेछन् ।
वि.सं.२०७८ कात्तिक ८ सोमवार १३:१८ मा प्रकाशित
