काठमाडौ । अर्थसचिव मधुकुमार मरासिनीले हुन्डी र सुन कारोबारले रेमिट्यान्समा नकारात्मक प्रभाव पारेको बताएका छन् । उनले विहिबार अर्थमन्त्रालयमा भएको चालु वर्षको प्रथम प्रगति समीक्षा एवम् मन्त्रालयस्तरीय विकास समस्या समाधान समितिको बैठकमा बोल्दै तरलताको समस्या समाधान गर्ने हो भने सुन र हुन्डीमा निगरानी राख्नुपर्ने बताएका हुन् ।
उनले हुन्डी मार्फत नेपालमा पैसा पठाउने गर्दा विदेशी मुद्रा विदेशमा नै रहने गरेको बताएका छन् । त्यस्तै उनले पछिल्लो समय नेपालमा विदेशी मुद्राको साटो सुन भित्रिरहेको पनि जिकिर गरे ।
त्यस्तै उनले विदेशबाट रकमको साटो सुन आउन थालेपछि नेपालमा तरलताको अभाव चुलिएको पनि उनको जिकिर थियो ।
सो बैठकमा अर्थमन्त्री जनार्दन शर्माले पुँजीगत खर्च नपढेको प्रति आपत्ति जनाउदै खर्च प्रणालीमा नयाँ प्रणाली अपनाउनुपर्ने बताए । त्यस्तै उनले सरकार आयात घटाउन लाग्नुपर्ने, लघुवित्त संस्थाहरुको व्याजदर एकल अंकमा झार्नुपर्ने, डिजिटल कारोबारलाई प्रसह्य दिनुपर्ने लगायतका कुराहरुमा जोड दिएका थिए ।
बैठकमा बैठकमा अर्थ मन्त्रालय अन्तर्गतका भन्सार विभाग, आन्तरिक राजस्व विभाग, महालेखा नियन्त्रक कार्यालयलगायतले कार्य प्रगति तथा त्रैमासिक समीक्षा प्रस्तुत गरेका थिए।
वि.सं.२०७८ मंसिर ९ बिहीवार १७:४३ मा प्रकाशित