काठमाडौं । कृषि विकास बैंकले पूर्व कर्मचारीहरुको स्वास्थ्य बीमा गरिदिने भएको छ ।
बैंकले पूर्व कर्मचारीहरुको १ वर्ष अवधिको लागि १ लाख रुपैयाँको सामुहिक स्वास्थ्य उपचार बीमा गर्न लागेको हो ।
बिहीबार एक सूचना निकाल्दै बैंकको जनशक्ति व्यवास्थपान विभागले पूर्व कर्मचारीहरुको सामुहिक स्वास्थ्य बीमा गर्नुपर्ने भएकाले निवेदन पेश गर्न अनुरोध गरेको छ ।
उक्त बीमाका लागि बैंकका कम्तीमा १५ वर्ष स्थायी, अस्थायी वा मासिक पारिश्रमिक, करारमा सेवा गरेका ७० वर्षभित्रका पूर्व कर्मचारी हुनुपर्ने बताइएको छ ।
पूर्व कर्मचारीहरुले आफू बसोबास गरेको वा पायक परेको बैंकको नजिकको कार्यालयमा निवेदन पेश गुर्नेछ ।
कृषि विकास बैंक लिमिटेड, कर्मचारी सेवा विनियमावलीको परिच्छेद ७ बमोजिम सजाय भई बैंकले बर्खास्ता गरेको वा अदालतबाट दोषी ठहर सजाय भएका कर्मचारीहरुलाई भने यो सुविधा नरहेको सूचनामा उल्लेख छ ।
यस्तै, निवेदनको साथमा बैंकले जारी गरेको पूर्व कर्मचारी परिचय पत्र वा प्रमाण पत्र र नागरिकताको फोटोकपि पेश गर्नुपर्नेछ ।
वि.सं.२०७९ साउन १२ बिहीवार ११:५८ मा प्रकाशित
