काठमाडौं । नेपाल स्टक एक्सचेञ्ज (नेप्से) मा हिमालयन हाइड्रोपावरको आईपीओ सूचीकृत भएको छ ।
शुक्रबार कम्पनीको १ करोड ९ लाख ५० हजार कित्ता आईपीओ सूचीकृत भएको हो । कम्पनीको स्टक सिम्बोल एचएचएल रहेको छ । उक्त सेयर अब आइतबारदेखि कारोबारमा आउने छ ।
नेप्सेले कम्पनीको आईपीओलाई पहिलो कारोबारको लागि ६७ रुपैयाँ ९६ पैसादेखि २२८ रुपैयाँ ९९ पैसा ओपन रेञ्ज तोकेको छ ।
कम्पनीको आर्थिक वर्ष २०७७/७८ को वास्तविक प्रतिसेयर नेटवर्थ ७६ रुपैयाँ ३३ रहेको छ । त्यसकारण कम्पनीको आईपीओले ६७ रुपैयाँ ९६ पैसादेखि २२८ रुपैयाँ ९९ पैसा ओपन रेञ्ज तोकेको हो । नेप्सेले कम्पनीको पहिलो कारोबारको लागि नेटवर्थको तीन गुणासम्म मूल्य रेञ्ज तोक्ने गर्दछ ।
कम्पनीले असार १५ गतेबाट १९ गतेसम्म कुल १९ करोड ६८ लाख २५ हजार रुपैयाँ बराबरको आइपीओ जारी गरेको थियो । जसमध्ये ५ प्रतिशत अर्थात् ९८ हजार ४१३ कित्ता सामूहिक लगानी कोष र २५ अर्थात् ३९ हजार ३६५ कित्ता सेयर कर्मचारीहरुका लागि छुट्याइएको थियो । बाँकी १८ लाख ३० हजार ४७२ कित्ताका लागि सर्वसाधारणले आवेदन दिन सक्ने व्यवस्था थियो ।
कम्पनीको आईपीओमा माग भन्दा धेरै आवेदन परेकाले गोलाप्रथाबाट वितरण गरिएको थियो । गोलाप्रथामार्फत १ लाख ८३ हजार ४७ जना सर्वसाधारण लगानीकर्ताहरुले सेयर पाएका छन् ।
जसमध्ये २ जनाले ११ कित्ता र बाँकीले १० कित्ताका दरले सेयर पाएका छन् । यो आइपीओमा कुल १५ लाख ९५ हजार ५५४ जनाले आवेदन परेको थियो । जसमध्ये १ हजार ७५८ जनाको आवेदन रद्द भएको थियो ।
वि.सं.२०७९ साउन २० शुक्रवार १२:४१ मा प्रकाशित
