लमजुङ । स्वदेशी लगानीमा निजीक्षेत्रले निर्माण गर्न लागेको ठूलो आयोजना मध्येको एक सुपर दोर्दी जलविद्युत आयोजना निर्माणका लागि आवश्यक ८० करोड रुपैयाँ जुटाइएकोछ ।
४९।६ मेगावाट क्षमता भएको यो आयोजना पिपुल्स हाइड्रोले निर्माण गर्न लागेको हो । नबिल बैंकको नेतृत्वमा नौ वटा बैंक तथा वित्तीय संस्थाहरुले सहवित्तीयकरणमा लगानी गर्न लागेका हुन् ।
कन्सोर्टियमको नेतृत्व नबिल बैंकले गरेको छ भने सह–नेतृत्व एभरेष्ट र ग्लोबल आईएमई बैंकले गरेका छन् । नविल बैंकले एक अर्ब २५ करोड, एभरेष्ट बैंकले एक अर्ब रुपैयाँ र ग्लोबल आईएमई बैंकले ९५ करोड रुपैयाँ कर्जा लगानी गर्ने संझौता भएको छ । यसमा प्रवद्र्धकले ३० प्रतिसत र बैंक तथा वित्तीय सस्थाबाट कर्जा लिएर ८० प्रतिसत स्रोत जुटाइने छ ।
लमजुङ ढोडेनी गाविसमा बाँध बाँधेर पाँच किलोमिटर सुरुङ मार्फत ६०१ मिटरको हेडबाट पानी खसालेर विद्युत उत्पादन गरिने छ । आयोजनाको पावर हाउस अण्डरग्राउण्ड हुनेछ । उत्पादित विजुली पावर हाउसबाट ६ किलोमिटर टाढा लमजुङको किर्तिपुरको सवस्टेशनमा पुर्याएर राष्ट्रिय प्रशारणमा जोडिने छ । किर्तिपुरको सबस्टेशन निर्माणाधिन छ ।
दोर्दी खोलामा चार आयोजना निर्माणाधिन छन् । यसमध्ये सुपरदोर्दी सबैभन्दा माथिको र ठूलो आयोजना हो । आयोजनाले २०७६ साल असोज २० गते विद्युत उत्पादन गर्ने लक्ष राखेको छ ।
१६ फागुन २०७२, ९।००
वि.सं.२०७२ फागुन १६ आइतवार १०:२३ मा प्रकाशित
