काठमाडौ । विश्वभरकोरोना भाइरसको संक्रमणबाट २ लाख ६५ हजार ४५ जनाको मृत्यु भएको छ । हालसम्म ३८ लाख २१ हजार ७ सय २६ जनामा संक्रमण देखिएको छ भने १२ लाख ९९ हजार ५ सय ११ जना निको भएर घर फर्किएका छन् ।
झण्डै पचास हजार संक्रमित गम्भीर रुपमा बिरामी परेको जनाइएको छ । विश्व स्वास्थ्य संगठनले गरेको पछिल्लो अद्यावधि अनुसार पछिल्लो २४ घण्टामा मात्रै ५ हजार ६ सय ८२ जनाको ज्यान गएको छ ।कोरोना भाइरस (कोभिड-१९) संक्रमित उपचारपछि निको हुने क्रम बढ्दै गएको छ।
संक्रमितमध्ये अहिले २२ लाख ५५ हजार ७ सय ७८ जना उपचारको क्रममा छन्। उपचारमा रहेका अधिकांशको अवस्था सामान्य छ। संक्रमितमध्ये ४८ हजार २ सय १ जनाको अवस्था गम्भीर छ।
बुधबार विश्वभर ९० हजारभन्दा धेरै नयाँ संक्रमित थपिएका छन्। पछिल्लो तथ्यांक अनुसार संक्रमणबाट २ लाख ६४ हजार २ सय ५२ जनाको मृत्यु भएको छ। गएको २४ घन्टामा विश्वमा ६२ सय २६ जनाको कोरोना संक्रमणबाट मृत्यु भएको छ।
अमेरिकामा गएको २४ घण्टामा १९ सय ७४ जनाको मृत्यु भएको छ। योसँगै त्यहाँ मृतकको संख्या ७४ हजार नाघेको छ। त्यहाँ संक्रमितको संख्या १२ लाख ५८ हजार ८ सय २ पुगेको छ।
त्यसैगरी बेलायतमा बुधबार कोरोना संक्रमणबाट ६ सय ४९ जनाको ज्यान गएपछि त्यहाँ मृतकको संख्या ३० हजार नाघेको छ। त्यस्तै ब्राजिलमा बुधबार ६ सय ४५ जनाले ज्यान गुमाएका छन् भने बेल्जियममा ३२३, इटालीमा ३६९, स्पेनमा २४४, फ्रान्समा २७८, क्यानाडामा १८०, मेक्सिकोमा २३६ जनाले ज्यान गुमाएका छन्।
भारतमा गएको २४ घन्टामा कोरोना संक्रमणबाट ९२ जनाको मृत्यु भएको छ। त्यहाँ अहिलेसम्म मृतकको संख्या १७ सय ८५ पुगेको छ भने संक्रमितको संख्या ५२ हजार ९ सय ८७ पुगेको छ।
बुधबार एकै दिन भारतमा ३५ सय ८७ जना नयाँ संक्रमित थपिएका छन्। संक्रमितमध्ये १५ हजारभन्दा धेरै उपचारपछि निको भएका छन्। नेपालमा संक्रमितको संख्या ९९ पुगेको छ । २२ जना निको भएर घर फर्केका छन् ।
वि.सं.२०७७ वैशाख २५ बिहीवार ०८:०८ मा प्रकाशित